Sunday, June 10, 2007

التعداد السكاني 2007-2006

سأل حاكمنا المشرف كم من الناس هناك في القاهرة
قالوا لنري
من لم يمت مع المئات في الباخرة
مات محروقا علي متن القاطرة
و من لم تطله اكياس الدم الماكرة
اصابته امراض الطيور المهاجرة
و من لم يقتله رصاص يوم المظاهرة
قتله اليهود عند حدود الدولة المجاورة
سكت الجميع للحظة
قالوا ليس هناك الا انت ونحن والبقية في طرة

Saturday, June 2, 2007

اول مدونة شبه شعرية - غير اللي بتتاكل - لية


ايام زمان كانت ايام ... ايام زمان كان في احلام

ايام زمان كنا بنقول ... لأي ظالم لأ علطول

ايام زمان زمان كان في رجالة ... بتحب بلدها وشغالة

دلوقتي بس في نسوان ... و الرجالة زي الخرفان

طب بينا نرجع لزماننا ... ونشوف ازاي بقى حالنا

دلوقتي مصر بقت تكية ... وماسكها شوية حرامية

مصر بلدنا عايشة في غم ... وعم حسني ساقيها دم

قال هيعدل في الدستور ... وبلدنا هيملاها النور

قام بوظ أم الدستور ... و ادى لكل مصري خبور

ما هو عايز يسبيها لجمال ... اصلة شارينا من البقال

والحزب الوطني الدجال ... يكمل سرقة ونصب ونهب

وكل ده والناس ساكتين ...عاملين ال روحهم مش عارفين

واللي منهم بيقول لأ ... من لسانه بيتعلق

بس في وسط الضلمة في نور ... وجاي يا حسني عليك الدور

بص يا ريس خدها نصيحة ... أصل وساختك بقت بريحة

هتخرج من العالم بفضيحة ... ومحدش هيسمي عليك

Thursday, May 3, 2007

جامعتي





جامعة القاهرة ترحب بكم ....




على السادة الراغبين في عبور الطريق القفز من فوق الحاجز الاول " رياضة الصباح "





مر الحاجز الاول بسلام والان الى الحاجز الثاني




وصلت الى البوابة ... مبروك , عايز ايه بقى ؟؟







اذا انت مصر على الدخول ويبدوا اننا سنضطر لاستعمال القوة






نعتذر عن نشر الصورة الحقيقية وذلك كي لا يحدث رعب لدى الطلاب الجدد






جامعة القاهرة ممنوع الاقتراب او التصوير و ترحب بكم



Wednesday, April 25, 2007

(البداية ( ادعولي أخلص بقى من العقد دي


وقفت كثيرا امام تلك الاوراق البيضاء التي لم تكتب فيها كلمة واحدة , نعم رأيت هذا المشهد في الامتحانات كثيرا ... لكنني لست في امتحان كما ان الغرفة التي اجلس بها تشبه تلك التي في بيتنا الى حد كبير. مازالت يداي ترتعشان كلما امسكت بقلمي وغمسته في قنينة الحبر حتى انها سكبت الان وانا اكتب هذه الكلمات وانا اسمع صوت الاقدام تقترب ..... تقترب ثم فتح الباب فجأة و..... ماما صرخت في بصوت عالي يملؤه الرعب :" انت دلقت الحبر على السجادة تاني " وقعت كلماتها على مسامعي كالرصاص وقررت ترك القلم والحبرو اخذت اركض اركض الى ان رأيته امامي انه هو .. نعم انه هو , في لحظات قليلة دارت في مخيلتي ذكريات امضيتها معه انه جهازي الحبيب . هذا الجهاز الذي في زاوية الغرفة كانت تعلوه كومة من الاتربة حتى ان العنكبوت وجد بيتا له بين ازراره . مضى وقت قليل انهمكت في تنظيفه , ثم ضغطت على الزر الكبير الموجود عليه و ..... اللعنة انه لا يعمل لابد ان احدا ما قد سرب تلك المعلومات الهامة عن نيتي العودة الى الكتابة مرة اخرى ودبرلي هذه المؤامرة الدنيئة , من يكون هذا الرجل الذي لايريدني ان اكتب مرة اخرى لابد انه بوش ... أو بلير .... ربما بان كى مون ..... ام انه عمو حبيب التييييت ولا يكونش حسني ؟؟؟؟!!! ولاد التييييت كتير بس مين فيهم . طب مين اللي قالهم البواب اه ماهو لسه واخد السجادة علشان ينضفها و لا تكونش ماما ؟؟؟!!... لأ.. ماما... لأ امال مين بس ؟؟ يا سيدي حبايبنا كتير و يلا مش مهم . دخلت امي مرة اخرى وهي تقول " انت بتعمل ايه قدام الكومبيوتر والنور مقطوع " , صرخت " النور مقطوع طب ما حد يقول يا جدعان " تنفست الصعداء و جلست امام الكومبيوتر أتأمل فيه و اذا بصوت لم اسمعه منذ مدة نعم انها تلك الزمارة التي تشير الى عمل الجهاز انتفضت من مكاني واقفا وانا انظر بتلهف حتي فتحت امامي تلك الشاشة وتلك الصورة التي لم اشاهدها منذ سنوات جلست على الكرسي وبدأت اشعر بقلبي ينبض بشدة و ضرباته تتسارع .. يداي ترتعشان مرة اخرى .... استجمعت ما تبقى لدي من قوة ,أخذت نفس عميق و .... بدأت اكتب مرة أخرى و دوت طرقعة الكيبورد مرة أخرى كما يقول عمرو مجدي

و ........................... شخ بخ ترخ ظهرت هذه المدونة .

Tuesday, April 24, 2007

تييييييييييييييييييت

ايوة هي دي الصفارة اللى بنسمعها لما حد يقول كلمة وحشة في فيلم ولا برنامج و لا اما بنسمع حد بيتكلم عن الحكومة وحش في مسرحية تقوم علطول شغالة تيييييييييت و المشكلة انك بتسمع الناس بتضحك بس ولاد التيييت مخلوكش تضحك معاهم

المهم انا عملت المدونة دي ليه ؟

سؤال كويس .... المدونة دي علشان نسمع اللي ورا الصفارة قصدي ان احنا عايشين كلنا ورا الصفارة - زي الراجل اللي في الصورة - بنتكلم و صوتنا مبيتسمعش لأن الصفارة صوتها اعلى مننا ، لكن لأ من النهاردة صوتي هيبقى اعلى من اي صفارة في الكون انا هنا هقول اللي نفسي فيه من غير ما حد يحط الصفارة على صوتي , يعني هتكلم من غير رقابة , محدش هيغطي على صوتي تاني .

I"m on toot